Sigmundur Davíð „plataður“

Samfylkingin, VG og Framsókn í samstarfi... og kannski áfram eftir kosningar... kosningabandalag? Ég skil ekki hvernig framsóknarmenn sætta sig við þessa minnihluta ríkisstjórn vinstrimanna. Og varðandi hlutverk Framsóknar í þessu öllu, hvernig geta þeir annars vegar sagt að "þeir telja sig ekki hafa umboð til að sitja í ríkisstjórn" en hins vegar leyft þessari vitleysu vinstristjórnarinnar að viðgangast? 

Eftir sem manni skilst þá er stjórnin að svíkja loforð... og er það í boði Framsóknar líka? Af hverju er ekki stjórnin sett af?

Annars vita menn að þetta er ekki í fyrsta skipti sem að foringi Framsóknarflokksins er „plataður“.

Sigmundi Davíð boðin sáttahönd

Frelsið og einstaklingurinn

Forysta vinstriflokka á Íslandi sá tækifæri í haust þegar bankakerfi þjóðarinnar hrundi og lýsti því yfir að grunnhugsjón Sjálfstæðisflokksins væri gjaldþrota rétt eins og bankarnir.

Eins og svo margir aðrir hef ég velt þessu fyrir mér og ákvað að skoða betur grunnhugsjón Sjálfstæðisflokksins sem talin var gjaldþrota. „Frjálshyggjan er fallinn“ sögðu vinstrimennirnir sem nú hafa náð tökum á valdastólum íslenska lýðveldisins.

Í kosningabaráttunni árið 2007 gaf Sjálfstæðisflokkurinn út kynningarmyndband. Í upphafi myndbandsins er grunnhugsjón flokksins lýst:

„Sjálfstæðisflokkurinn hefur frelsi og sjálfstæði einstaklingsins að leiðarljósi. Þetta er grundvöllur afstöðu flokksins í öllum málum. Þetta er það sem Sjálfstæðisflokkurinn stendur fyrir. Sjálfstæðisflokkurinn trúir á einstaklinginn og frelsi hans til að þroska og njóta hæfileika sinna í samfélagi þar sem allir hafa jöfn tækifæri. Það er í þannig samfélagi sem einstaklingar og fyrirtæki vaxa og dafna öllum til hagsbóta. Við teljum að þetta samfélag verði best tryggt með lágmarks afskiptum hins opinbera en jafnframt stuðningi við þá sem á þurfa að halda með sterku öryggisneti.“

Á vefsíðu flokksins segir einnig um hugmyndafræðina að „hún gefur sig ekki út fyrir að vera nákvæm forskrift að fullkomnu ríki enda lifa slík fyrirmyndarríki sjaldnast sjálfstæðu lífi utan kennisetninga og fræðikerfa“.

Draga má þennan texta saman í nokkra punkta:
- Frelsi og sjálfstæði einstaklingsins.
- Jöfn tækifæri.
- Lágmarks afskipti hins opinbera.
- Sterkt öryggisnet fyrir þá sem þurfa á slíku að halda.
- Sjálfstæðisstefnan ekki nákvæm forskrift á fullkomnu ríki.

Orðin tala fyrir sig. Ég mun gera það sem ég get til að standa vörð um þessa grunnhugsjón því hún varð aldrei gjaldþrota. Því miður hafa íslensk stjórnmál haft tilhneigingu til að snúast um völd en ekki hugsjónir. Sjálfstæðisflokkurinn verður að taka þetta til sín ásamt öllum öðrum stjórnmálaflokkum. Þessu skal breyta með nýrri kynslóð stjórnmálamanna á Alþingi sem þora að hafa skoðanir og láta til sín taka!

Deiglan.com, 2. mars 2009.

Baðst afsökunar á mistökum

Aldrei Ingibjörgu að kenna

Ingibjörg Sólrún sagði að hún hefði ekki, frekar en aðrir, búist við því að kerfishrun eins og varð hér gæti orðið að veruleika.

 

Nú þarf Ingibjörg að útskýra. Ef hún segir við okkur núna að hún hafi ekki, frekar en aðrir, búist við þessu...? Hvað þýðir það? Hún skammar Seðlabanka Íslands og Fjármálaeftirlitið fyrir að hafa ekki brugðist við tilmælum frá ríkisstjórninni með nógu miklum krafti. En af hverju ættu stjórntæki ríkisstjórnarinnar að bregðast við með slíkum krafti ef afstaða stjórnarinnar var sú að kerfishrun væri frekar ólíklegt?

Má þá spyrja hvort Ingibjörg hafi ekki brugðist við með nógu miklum krafti? Stjórnmálamenn eru snillingar í að koma ábyrgð og sök yfir á aðra.

IMF varaði við í apríl

Dagur fór beint á fésið

Dagur B. Eggertsson, borgarfulltrúi, tilkynnir framboð sitt til varaformanns Samfylkingarinnar á Fésbókinni (e. Facebook). Hvað finnst samfylkingarmönnum um Dag B. sem varaformann og Jón Baldvin sem formann? Ætlar Dagur B. ekkert á þing? Hér með færslunni er mynd af hugsanlegri forystu Samfylkingarinnar fyrir alþingiskosningarnar í apríl. Er ekki pláss fyrir konur þegar kemur að endurnýjun forystu þessa ágæta flokks? Ingibjörg og Jóhanna eru ekki tákn endurnýjunar. Þær eiga að hleypa næstu kynslóð samfylkingarkvenna að borðinu.

Dagur í varaformanninn

Hvað var gert?

Steingrímur J. Sigfússon fjármálaráðherra telur allar vísbendingar vera í þá átt að verðbólga og vextir lækki hratt á næstu mánuðum. 

Jæja, Steingrímur. Hvað var það nákvæmlega sem ríkisstjórn þín gerði til að ná verðbólgunni niður sem gefur okkur tækifæri til að lækka vexti?

Vextir fara að lækka

Ekki stjórnarskrárbrot ef um „topp" mann er að ræða

Með ráðningu seðlabankastjóra hefur verið framið stjórnarskrárbrot að mati Sigurðar Líndal lagaprófessors samanber viðtal við hann í Fréttablaðinu í dag. Þar kemur fram að stjórnarskrá íslenska lýðveldisins bannar skipun embættismanna hér á landi sem ekki eru með íslenskan ríkisborgararétt.

Aðspurð í fréttatíma RÚV nú í kvöld sagði forsætisráðherra að þessi skipan væri réttmæt þar sem um „topp" mann væri að ræða. Í fréttum hefur einnig komið fram að þessi Norðmaður er rótgróinn flokksmaður í norska Verkamannaflokknum og var meðal annars aðstoðarfjármálaráðherra þess flokks um skeið. Það að Jens Stoltenberg, flokksbróðir nýja seðlabankastjóra Íslands, skyldi gera sér ferð og heimsækja hann í seðlabankann í dag undirstrikar vitaskuld hversu ópólitískur maðurinn hlýtur að vera, eða hvað?

Í þessu máli eru fagleg sjónarmið alls ráðandi eins og í öðrum ráðningum þessarar ríkisstjórnar til opinberra starfa. Til dæmis vekur hin faglega skipan Svarars Gestssonar, sendiherra og fyrrv. formanns Alþýðubandalagsins, sem formanns samninganefndar um IceSave-reikningana sérstaka athygli. Þótt Steingrímur hafi ekki verið spurður út í þessa skipan sérstaklega þá er hér örugglega líka um „topp" mann að ræða. Að vísu kom fram hjá fjármálaráðherra í kvöldfréttum í gær að hann væri miður sín yfir því að Svavar skuli ekki vera kona, enda komast fáar konur að þegar fjármálaráðherra er í ráðningarham.

Þarf að skoða málið betur

Svein og Jens í Seðlabankanum

Norska "samfylkingin" mætt til starfa á Íslandi. Markmið: koma Íslandi inn í Evrópusambandið

Norðmennirnir plotta saman í seðlabankanum. Ég nenni nú ekki að eyða of mörgum orðum í þetta mál. Kannski finnst fólki þetta vera ómerkilegt mál... en þetta er samt frekar sérstakt. Nýr norskur seðlabankastjóri... og Jens forsætisráðherra Noregs mættur á fyrsta starfsdegi.

Var ekki einhver spámaður að segja um daginn að Ísland mun enda sem ríki í Bandaríkjunum og að Barack Obama verði þá forseti Íslands?

Kannski endum við bara sem fylki í Noregi. :P

Stoltenberg fyrsti gestur seðlabankastjóra

Tveir í flokki

Svakalegt að fylgjast með Frjálslynda flokknum á hraðri niðurleið. Tveir eftir í þingflokki.. annars vegar formaður flokksins og hins vegar þingflokksformaður. Ég spái því að eftir kosningarnar í vor verðum við komin með öflugt fjórflokkakerfi á ný.

Kristinn hættur í þingflokki frjálslyndra

Dæmalaus vinnubrögð fjármálaráðherra!

Hvernig stóð á því að skipaður var bankaráðsformaður Nýja Kaupþings í gær 24. febrúar og hann hættur í dag 25. febrúar? Hvernig má það vera að maður skuli vera ráðinn bankaráðsformaður Nýja Kaupþings án þess að kannað sé hvort maðurinn hafi tíma til að sinna starfinu. Hvernig stendur á því að ráðning í þessa mikilvægu stöðu var ekki betur ígrunduð af Steingrími J. Sigfússyni, nýja fjármálaráðherra Íslands?

Eru þessi óvönduðu vinnubrögð til þess fallinn að auka traust almennings á bankakerfinu?

Smá viðbót: Getur verið að Jóhanna Sig hafi kannski boðið betur og boðið honum tímabundið starf í Seðlabankanum?

Jafnréttisstefna Steingríms Joð

Af AMX.is: 

Svavar Gestsson sendiherra verður formaður nýrrar samninganefndar um Icesave-skuldbindingarnar. Auk Svavars sitja í nefndinni Páll Þórhallsson, settur skrifstofustjóri í ráðuneytinu, Indriði H. Þorláksson, ráðuneytisstjóri í fjármálaráðuneytinu, Áslaug Árnadóttir, skrifstofustjóri í viðskiptaráðuneytinu, Martin Eyjólfsson, deildarstjóri í utanríkisráðuneytinu og Sturla Pálsson, framkvæmdastjóri í Seðlabankanum. Þá hefur verið skipuð samninganefnd vegna þeirra lána sem Íslendingum hefur verið heitið frá nokkrum ríkjum. Jón Sigurðsson, skipaður af fjármálaráðherra, verður formaður nefndarinnar. Þá sitja í nefndinni Sturla Pálsson, Martin Eyjólfsson og Björn Rúnar Guðmundsson, skrifstofustjóri í forsætisráðuneytinu.“

 

Það hefur því nú komið í ljós að orð Steingríms Joð í stjórnarandstöðu um mikilvægi þess að gæta kynjajafnréttis í skipan opinberra nefnda og ráða eru marklaus þegar til kastanna kemur. Í nýjasta dæmi um skipan í samninganefndir vegna icesave-reikninga og erlendra lántöku ríkisins er einungis að finna eina konu. Í samtali við fjármálaráðherra í fréttatíma í kvöld viðurkenndi hann að þetta væri alls ekki nógu gott. Nú hlýtur fólk að velta fyrir sér hver stefna Steingríms Joð og VG sé í jafnréttismálum.