Stjórn Sjálfstæðisflokksins

Það eru nú frekar margir sem vilja sjá Sjálfstæðisflokkinn og Samfylkinguna í ríkisstjórn. Ég er sammála því að rétt var að láta Framsóknarmenn fara frá og að þessi nýja stjórn geti verið nokkuð áhugaverð.

Kjósendur hafa gefið stjórnmálamönnum þjóðarinnar mjög skýr skilaboð með atkvæðum sínum 12.maí sl. En ég vona að Geir gefi ekkert eftir. Sjálfstæðismenn eru sigurvegarar þessara Alþingiskosninga og Samfylkingin tapaði þingmönnum. Kjósendur vilja sjá nýja ríkisstjórn en þá vel merkta Sjálfstæðisflokknum.

Ingibjörg Sólrún: VG vildi ekki mynda stjórn með Framsóknarflokki

Spurning: hversu margir lögreglumenn starfa í Aþenu?

"[...]um 15.000 lögreglumenn munu verða á vakt í Aþenu. Því munu aðeins þeir lögreglumenn sem eru ekki á vakt taka þátt í mótmælunum."

Þegar 15.000 lögreglumenn eru á vakt í Aþenu... hversu margir eru þá EKKI á vakt? :P

Gríska lögreglan boðar til mótmæla á úrslitakvöldi Meistaradeildar Evrópu

Sarkozy, dulmálslykillinn og óþekktur hermaður

Sarkozy nýr forseti í Frakklandi í dag, ný ríkisstjórn skipuð á morgun og Jacques Chirac gefur frá sér dulmálslykilinn að kjarnorkuvopnabúrinu. Margar breytingar eiga sér stað í Frakklandi nú á dögum og að mínu mati var tími kominn til þess. Gott að fá nýja leikmenn í alþjóðastjórnmálakerfinu. Ég hlakka til að fylgjast með Sarkozy og stefnu hans um að til dæmis bæta samskipti Evrópu- og Bandaríkjamanna.

Sarkozy tekur við forsetaembættinu í dag

Wolfowitz í vandræðum

Þessi frétt á mbl.is segir afskaplega lítið um málið. Leiðinlegar þessar stuttu skyndifréttir. Styrmir Gunnarsson(ritstjóri Morgunblaðsins) sagði í vor, þegar hann heimsótti okkur í stjórnmálafræðinni, að Morgunblaðið væri að reyna finna leiðir til að ná til nýrra kynslóða sem hefur sjaldan tíma til að lesa fréttir. En það er nú leiðinlegt þegar fréttirnar eru þetta stuttar og frekar innihaldslausar. Oft þarf að fylgjast með mbl.is allan daginn til að ná allri sögunni þar sem stór mál eins og Wolfowitz-málið koma í 3, 4 eða 5 hlutum yfir daginn. Jafnvel fleiri. Stundum þarf að hafa lesið allar fréttir á mbl.is um málið til að skilja út á hvað það gengur. Vantar til dæmis tengla inn á eldri fréttir um sama mál.

Wolfowitz í vandræðum
Þetta með Paul Wolfowitz, forstjóra Alþjóðabankans, er nokkuð spennandi. Starfsmenn bankans, Demókratar í Bandaríkjunum og anti-Bush-fólk um allan heim vilja núna neyða Wolfowitz til að segja af sér. Ekki er hægt að vera annað en sammála ef allt er satt sem andstæðingar forstjórans segja. Ef Wolfowitz nýtir sér spillingu til að hækka laun kærustu sinnar (var komin upp í 200.000 dollara í árslaun) þá er hann kannski ekki hæfasti aðili til að sinna stöðu forstjóra Alþjóðabankans. Bankinn starfar víða um heim og veitir ríkjum lán til að bæta efnahagskerfi þeirra ásamt því að vinna gegn til dæmis spillingu.

Mig grunar samt að þetta sé frekar lítið mál en að valdabaráttan í pólitíkinni geri þetta að stórmáli. Þetta snýst örugglega bara um vald og að skaða forseta G.W.Bush. Ekki er það G7 sem tekur ákvörðun í þessu máli, heldur er það stjórn Alþjóðabankans. Þeir verða sjálfir að koma sér saman um hvort hægt sé að treysta Paul Wolfowitz. Japanar tóku afstöðu með Bandaríkjamönnum sem óska eftir því að hann haldi áfram störfum sínum og reikna ég með því að Nicolas Sarkozy, nýi forseti Frakklands, taki einnig afstöðu með þeim þegar hann tekur formlega við forsetaembætti sínu.

En Kanada var á móti því að Wolfowitz myndi halda áfram starfi sínu. Einnig hefur John Edwards, frambjóðandi í prófkjöri Demókrata í Bandaríkjunum, sagt meðal annars: "America's ability to lead in the fight against global poverty is undermined with Paul Wolfowitz at the helm of the World Bank. He should resign". Styttist í forsetakosningar í Bandaríkjunum og örugglega margir sem vilja nýta sér þetta tækifæri til að skjóta á Repúblikana sem Wolfowitz hefur í kringum sig.

Bandaríkjunum tókst ekki að fá G7 ríkin til að styðja Wolfowitz

Madeleine ekki komin heim

Martröð allra foreldra. Madeleine hvarf fyrir um það bil viku síðan í Praia Da Luz, Portúgal. Hún var ásamt tvíburasystkinum sínum sofandi í sumarhúsi fjölskyldunnar. Foreldrarnir voru að borða á veitingastað 40m frá íbúðinni og fóru reglulega inn til barnanna til að athuga hvort allt væri ekki í lagi. En einhver náði Madeleine sem svaf þarna í sakleysi sínu.

Núna er verið að yfirheyra breskan mann (sjá efstu mynd til hægri) sem gæti hugsanlegi verið mannræninginn. Maðurinn á sjálfur þriggja ára gamla stúlku og sagt er að hún eigi að vera nokkuð lík henni Madeleine. Þessi maður og kona hans eru að skilja og þurfa hugsanlega að fara með mál sitt fyrir rétti til að láta úrskurða hver eigi að fá forræði yfir barninu. Móðirin er með stúlkuna í dag.

Núna er verið að rannsaka hús mannsins sem er einungis 130 metrum frá íbúðinni sem Madeleine var í þegar henni var rænt. Einnig starfaði Bretinn með lögreglunni og fjölmiðlum í málinu sem meðal annars þýðandi. Hann er ekki handtekinn, heldur er einungis verið að skoða nýjustu spor og upplýsingar. Bretinn er þekktur meðal nágranna sinna og starfar sem fasteignasali í Praia Da Luz.

Lögreglan sem rannsakar málið er í því að fylgjast með fleiri mönnum og er alveg skiljanlegt að upplýsingar sem koma frá lögreglunni eru takmarkaðar. Alveg nauðsynlegt að leyfa lögreglunni að sinna sínu starfi í friði. Vonandi virða fjölmiðlar það.

Ekki getum við gert annað en að halda þessu máli á dagskrá og dreifa sögunni. Vonandi snýst þetta mál um peninga og að haft verði samband við foreldra hennar Madeleine. En lögreglan segist því miður ekki geta útilokað að mannræninginn hafi verið barnaníðingur. 

Breti yfirheyrður í tengslum við hvarf Madeleine McCann

Hunsun alþjóðamála

Það er nú bara þannig að Íslendingar vita varla neitt um bandarísk eða alþjóðleg stjórnmál. Flestir nenna rétt svo að kynna sér það sem er í gangi á Íslandi. Fréttaflutningur íslenskra fjölmiðla um utanríkismál er nú frekar lélegur og mjög svo takmarkaður.

Af erlendri fréttaumfjöllun á Íslandi þá mætti halda að það sem mest er fjallað um sé Eurovision. Kannski er það rangt hjá mér að segja að Íslendingar séu ekki alþjóðlegir. En þarf maður ekki að vita eitthvað um þessi mál ásamt því að vera virkur þátttakandi til þess að geta talist alþjóðlegur? Vanþekking er áhyggjuefni þegar kemur að fréttaflutningi, kennslu og kunnáttu á Íslandi hvað varðar alþjóðleg stjórnmál. Það er sjaldan fjallað um þróun alþjóðasamfélagsins og samkvæmt ýmsum fræðimönnum er það sérstakt vandarmál að alþjóðavæðing sé ekki kennd nægilega vel.

Það má vel vera að skortur á fjármagni komi í veg fyrir að íslenskir fjölmiðlar geti leyft sér að flytja ítarlegan fréttaflutning um alþjóðleg málefni. En fyrir þá sem hafa áhuga á þessum málefnum er afskaplega leiðinlegt að lesa ílla unnar skyndifréttir og því hef ég minnkað töluvert lestur minn um utanríkismál á mbl.is og visir.is.

Ég er einn af þessum svokölluðu fréttafíklum og fer örugglega 50 sinnum inn á mbl.is og visir.is á hverjum degi ásamt því að lesa blöð, greinar og vefrit þegar tíminn leyfir slíkt. Bara til að fylgjast með og sjá hvaða mál eru á dagskrá á hverjum tíma. Það má að minnsta kosti staðfesta að fyrrnefndar fréttavefsíður séu á réttri leið. Einnig á Davíð Logi Sigurðsson hjá Morgunblaðinu sérstakt hrós skilið fyrir fréttaflutning sinn um alþjóðleg málefni.

Utanríkismál á deiglunni
Nú er margt spennandi á dagskrá hjá alþjóðasamfélaginu. Þar má nefna framtíðarstórmál eins og þróun Rússlands. Á næstu áratugum verður Evrópusambandið mjög háð Rússlandi í orkumálum. Í dag eru 25% af gasbyrgðum sambandsins frá Rússlandi og fer þetta upp í 60% á næstu áratugum. Það er að mínu mati mjög athyglisvert að varla skuli vera umfjöllun um þessi mál á Íslandi þar sem þau eru afar tengd þeim málum sem eru í gangi núna. Það tengist þá samstarfi Íslendinga og Norðmanna á norðurhafssvæðum. Reikna má með miklum deilum fyrir norðan sem munu tengjast auðlindum og siglingaleiðum. Þetta er meðal annars ein af ástæðunum fyrir öllum þessum áhuga Norðmanna hvað varðar samstarf við Ísland.

Önnur mál á dagksrá alþjóðasamfélagisins eru til dæmis þróun Sameinuðu þjóðanna og óstöðuleiki Mið-Austurlanda. Eiga gömlu stórveldin að vera með veto/neitunarvald í Öryggisráðinu? Eiga fleiri ríki að fá veto? Er í lagi að leyfa Írönum að hunsa alþjóðlegt vald? Ætti að koma Bandaríkjamönnum í spennitreyju til að halda þeim rólegum? Hversu frjáls á alþjóðavæðingin að vera? Eigum við að setja kröfur í þessari þróun?

Það eru óteljandi mál sem hægt væri að fjalla nánar um og mun ég örugglega renna í nokkur hér á Deiglunni á næstunni. Einnig eru aðrir deiglupennar sem skrifa mjög skemmtilega og fróðlega pistla um ýmis utanríkismál. Ég hvet alla áhugasama til að leita í pistlasafni Deiglunnar því þar finnst mikið af góðu lesefni.

Deiglan.com 14.maí 2007

Aftur: Of margar skoðanakannanir

Skoðanakannanir geta alveg verið góðar. En það sem margir segja nú á dögum er að þær eru bara einfaldlega of margar. Þessar kannanir fá alla vega allt of mikla athygli meðal fjölmiðla. Fjölmiðlar eiga ekki að eyða öllu þessu mikilvæga plássi hjá sér í svona innihaldslausar fréttir, heldur flytja alvöru fréttir af málefnum, stefnum, áherslum flokka og frambjóðenda.

Ég sem kjósandi þarf ekki að vita hver staðan er á hverjum degi.

Hafa kannanir áhrif á kjósendur?

Of margar skoðanakannanir!

Ég veit ekki alveg með þessar kannanir. En að mínu mati fer of mikið púður í þær á til dæmis forsíðum og/eða bestu síðum dagblaða. Einnig fer of mikill tími stjórnmálamanna í að kommenta og túlka skoðanakannanir. Segja hvort sem er alltaf það sama.

Nokkrar kannanir yfir vorið og nokkrar fyrir kosningar gefa okkur góðar og fínar vísbendingar, en þetta er orðið of mikið. Stundum er maður að lesa fleiri kannanir á dag og ekkert talað um annað en fylgi flokka samkvæmt skoðanakönnun. Það væri betra að fá málefnin á forsíður dagblaðanna, ekki skoðanakannanir heldur alvöru skoðanir.

Hvað varðar fylgi flokka, þá er það bara eitt sem skiptir máli þar: alvöru atkvæði í kjörkassa.  

Ríkisstjórnin fallin samkvæmt nýrri skoðanakönnun

Money makes the world go around

Hvað með "money makes Iran go around? Það er þá alla vega einnig þannig með Íran, eins og með t.d. Kína, að viðskiptin leiðbeina stjórnmálamönnum þar yfir í friðsamlega hegðun. Eins og sagt er í fréttinni á mbl.is þá hagnast Íran mun meira á stöðuleika og vaxandi hagkerfi í Afganistan. Þetta sýnir okkur hversu öflug frjáls viðskipti geta verið. Ekki hafa Bandaríkin með allt vald sitt geta fengið Írana til að skipta um skoðun eða hegða sér öðruvísi. Einungis viðskipti hafa áhrif á þessa stjórn. Þann 12. febrúar 2007 lýsti Mahmoud Ahmadinejad, forseti Írans, því yfir að Íran óttast ekki bandaríska herinn og að Íranar muni refsa Bandaríkjamönnum grimmilega ef þeir ráðast á landið.

En það er auðvita ekki í lagi að Íranar veiti Talibönum aðstoð. Við verðum að finna leið til að refsa ríkjum eins og Íran í þessu tilfelli án þess að þurfa ráðast á til dæmis efnahagskerfið. Viðskiptin/efnahagurinn er einmitt það afl sem hefur jákvæð áhrif á Íran. Viðskiptabann er að mínu mati ekki rétta leiðin. Skulum ekki vinna gegn eina aflinu sem hefur náð árangri.

Hvað ætti alþjóðasamfélagið að gera?

Bretar saka Íran um að veita Talibönum aðstoð í Afganistan

Stefnubreytingar væntanlegar 2008?

Það er alveg öruggt að með Obama sem forseta, þá verða miklar stefnubreytingar í Bandaríkjunum á hans kjörtímabili(um). Ég er sammála því að það þarf að hvetja til framleiðslu á sparneytnum bílum. Leiðandi bílaframleiðendur í heiminum í dag eru þau fyrirtæki sem framleiða sparneytna bíla. Meðal verst settu framleiðendum eru meðal annars þeir bandarísku.

En svo er bara spurning hvað ríkið getur eða á að gera. Ríkisstyrk? Fella niður gjöld, tolla osfrv? Obama-lausnin: ríkið aðstoða framleiðendur fjárhagslega við að sjá hluta af fyrrum starfsmönnum sem komnir eru á eftirlaun fyrir sjúkratryggingum?

Obama hyggst breyta orkustefnu Bandaríkjanna

Norska kökuskrímslið

Norðmenn mættu á kjörstað og kusu yfir sig vinstristjórn fyrir næstu fjögur árin. En þá tók norska kökuskrímslið John Waagaard sig til og dúndraði einni köku í andlitið á nýja fjármálaráðherra. Það væri kannski rétt að gefa Jens Stoltenberg 30 daga dóm líka fyrir að gefa þessum sósíalistum ráðherrasæti og þá sérstaklega fyrir að sjá til þess að Kristín Halvorsen(SV) yrði fjármálaráðherra. 

Í fangelsi fyrir kökukast

Nýtt afl innan alþjóðlegra stjórnmála

Með góðu samstarfi á seinni hluta 20.aldar þá náðum við til dæmis að stofna SÞ, NATO, EFTA, ESB, IMF, World Bank, WTO, WHO o.fl. Við náðum að móta alþjóðlegt stjórnmálasamfélag ásamt því að ná efnahag Evrópu upp úr rústunum eftir stríð.

Ef það kemur til frekari togstreitu á milli Bandaríkjanna og Evrópu á það ekki eftir að þjóna neinu, þessi tvö heismveldi verða að vinna saman. Vinna saman til að takast á við aukna alþjóðavæðingu, öryggis- og varnarmál, þróun alþjóðastofnana o.fl.

Ég er nokkuð viss um að Sarkozy mun afreka margt gott sem forseti Frakka. Þá sérstaklega til að bæta tengsl og samskipti Frakklands/Evrópu við Bandaríkin. Nicolas Sarkozy í Frakklandi og Barack Obama í Bna,  alþjóðasamfélagið þarf á þessum nýju leikmönnum að halda.

Bush óskar Sarkozy til hamingju

Forseti Frakklands: Nicolas Sarkozy

Hægrimaðurinn Sarkozy sigraði forsetakosningarnar í Frakklandi í dag. Hann hefur núna lýst yfir sigri opinberlega. Ségolène Royal, frambjóðandi sósíalista í forsetakosningum í Frakklandi í dag, viðurkenndi ósigur sinn fyrir Nicolas Sarkozy, frambjóðanda hægrimanna. Fréttastöðin France24 hefur birt frétt, myndband og nánari umfjöllun af nýja forseta sínum.

Sarkozy á FRANCE24 og Time.com 

 

 

CNN: New French leader: U.S. can rely on our friendship

Sarkozy lýsir yfir sigri í Frakklandi

Frivolous lawsuits beware!

Forseti Frakklands: alþjóðlegur stjórnmálamaður

MBL.IS: "Belgískir fjölmiðlar spá því að Nicholas Sarkozy hafi sigur í forsetakosningunum sem lýkur í Frakklandi klukkan 18 að íslenskum tíma, og fái rúmlega 53% atkvæða. Keppinautur hans, Segolene Royal, fái um 47%. Belgíska vefsetrið 7sur7 segir að samkvæmt útgönguspá sem innanríkisráðuneytið í París hafi látið fjölmiðlum í té verði Sarkozy kjörinn með 53,5% atkvæða, en Royal hljóti 46,5%."

Það er nú bara þannig að þessi kosning er mikilvæg einnig fyrir okkur Íslendinga. Alþjóðasamfélag er að mótast og þar er forseti Frakklands einn af forystumönnum. Einn af forystumönnum Evrópusambandsins og alþjóðlegra stjórnmála. Með nýjum forseta í Frakklandi má spryja til dæmis: "Hvernig verða samskiptin á milli Frakka og Bandaríkjamanna?" eða "Hvernig mun Evrópusambandið þróast á næstu árum?" 

Samkvæmt útgönguspám í Frakklandi fær Sarkozy 52-55% atkvæða

Hvirfilbylur á Íslandi?

Sex manns létu lífið þegar hvirfibylur lagði stóran hluta bæjarins Greensburg í Kansas í rúst í nótt. En hvað er hvirfilbylur? Haraldur Ólafsson, veðurfræðingur(prófessor í veðurfræði við HÍ), hefur skrifað svar á visindavefur.hi.is.

VISINDAVEFUR.HI.IS: Hvirfilbylur eða skýstrokkur er loft sem snýst ógnarhratt í hring, líkt og iða sem myndast yfir útfalli í baðkari þegar vatnið streymir út. Í samanburði við lægðir og fellibylji eru hvirfilbyljir örsmáir og skammlífir, en vindhraðinn í þeim getur samt verið meiri. Hvirfilbyljir eru aðeins nokkur hundruð metrar í þvermál, en ferðast hæglega á annað hundrað kílómetra á 1-2 klukkustundum. Vindhraði í hvirfilbyljum getur farið yfir 100 m/s og er eyðilegging í samræmi við það. [...] Hvirfilbyljir myndast í mjög óstöðugu lofti, gjarnan í grennd við þrumuveður. Þeir tengjast miklu uppstreymi á takmörkuðu svæði. Í stað þess lofts sem streymir upp leitar loft inn að miðju uppstreymisins og við það margfaldast snúningur þess, líkt og þegar listdansari á skautum leggur hendurnar upp að líkamanum.

Öflugir hvirfilbyljir eru algengir á vorin í Bandaríkjunum og einnig í Ástralíu. Nýlegar rannsóknir benda til að hvirfilbyljir séu einnig algengir á Bretlandseyjum, en þar eru þeir oftast vægir. Hvirfilbyljir eru sjaldgæfir á Íslandi, og yfirleitt ekki svo ýkja öflugir þá sjaldan þeir verða. Þó eru til frásagnir frá fyrri öldum um veðurskaða sem líklega tengist hvirfilbyljum. Sagt er frá hvirfilbyljum eða skýstrokkum á Íslandi í tímaritinu Veðrinu árin 1958 og 1961.

Hvirfilbylir bana sjö í Kansas

Royal og Sarkozy á Deiglunni í dag

Góður pistill á Deiglunni í dag. Það er Fanney Rós Þorsteinsdóttir, héraðsdómslögmaður, sem skrifar um forsetakosningarnar í Frakklandi. Síðasta umferð kosninganna fer fram á morgun. Á Deiglunni skrifar Fanney Rós meðal annars:

"Með kosningunum tekur ný kynslóð við í frönskum stjórnmálum, enda eru báðir frambjóðendurnir meira en tuttugu árum yngri en Jacques Chirac, fráfarandi Frakklandsforseti. Royal er fyrsta konan sem nær í aðra umferð forsetakosninga og Sarkozy er fyrsti frambjóðandinn sem á erlendan föður – en faðir hans flúði Ungverjaland í tíð kommúnista. [...] Hver svo sem niðurstaða kosninganna á morgun verður er ólíklegt að mikilla breytinga sé að vænta á utanríkisstefnu Frakklands." 

LESA PISTIL 

Kosningasjónvarp eða Eurovision?

Það ætti nú að vera áhugavert fyrir félagsvísindamenn á Íslandi að skoða nánar hegðun kjósenda á þessu kosningakvöldi. Því oft er sagt að stjórnmálaflokkar nú á dögum þurfa að keppa við allt mögulegt eins og til dæmis tölvuleiki, íþróttaatburði, almennt sjónvarp og til dæmis  sérstaklega sjónvarpsefni eins og Eurovision. Þá til að ná athygli kjósenda.

Þess vegna væri kannski sniðugt að rannsaka hegðun Íslendinga á þessu kvöldi, og sjá hversu margir horfa á:

1. Kosningasjónvarpið

2. Eurovison

3. Kosningasjónvarpið og Eurovision

4. Hvorki kosningasjónvarp né Eurovision

Ég ætla mér nú að horfa á Eurovison og kosningasjónvarpið. Vonandi verður einhver kosningavaka sem sýnir bæði. :P En svo er ekkert öruggt að Ísland verði með í lokaumferð í Eurovision. Ef það endar þannig þá er nú minnsta mál að sleppa Eurovision. 

Fyrsta æfingin í Helsinki í dag

President Sarkozy

Sarkozy mælist með 55% fylgi. Royal einungis 45%. 91% Frakka hafa gert upp hug sinn.

Ég byrjaði að blogga um þessar kosningar eftir fyrstu umferð. Þegar ég hafði ekki kynnt mér kosningarnar, þá reiknaði ég með því að Royal var nokkuð örugg með þetta. Alla vega samkvæmt fréttaflutningi hér á landi. 

Það er ánægjulegt að vinstrimenn tapa fylgi og var það sem forsetaframbjóðenda þeirra sagði fyrr í dag til skammar. Úr frétt á mbl.is: "Segolene Royal varaði í morgun við því að Frakkland gæti orðið vitni að ofbeldi og átökum ef Nicolas Sarkozy vinnur forsetakosninguna á sunnudaginn kemur..."

Nú veit ég ekki hvenær þessi könnun var framkvæmd, hvort dagurinn í dag hefur haft einhver áhrif. En það er alveg klárt mál að slíkar árásir hafa öfug áhrif og mun hún bara tapa á þessu.

Sarkozy eykur enn forskot sitt

Mín spá - alþingiskosningar 12.maí nk.

Það styttist í kosningar. Í nokkrar vikur núna hefur verið spurningakönnun hér á blogginu þar sem spurt var hvað fólk ætlar að kjósa. Ég ætla mér að vera svo "vísindalegur" og nota þessa frábæru könnun þar sem rúmlega 100 manns tóku þátt (ekkert verri könnun en það sem Fréttablaðið birtir:P). Nota svo niðurstöðuna til að spá um úrslit kosninganna, þar sem ég held að þetta sé nokkuð sambærilegt þeim könnunum sem hafa verið birtar síðustu vikur. Leyfi mér nú samt að nota 2 prósent skekkjumörk. Mín spá verður þannig séð þessi:

 

Sjálfstæðisflokkurinn:     

35,2%      (37,2%)     39,2%

Samfylkingin:                   

21,1%      (23,1%)     25,1%

Vinstri grænir:                    

14,5%      (16,5%)     18,5%

Framsóknarflokkurinn:       

11,2%      (13,2%)     15,2%

Íslandshreyfingin:                

4,5%        (6,6%)       8,6%

Frjálslyndi flokkurinn:           

0,5%        (2,5%)       4,5%

Sjálfstæðisflokkurinn mun vera nær efri öryggismörkum. Það veit nú engin hvernig vinstrimenn landsins ætla að raða sér niður, bara vitleysa í henni Ingibjörgu þegar hún segir að Samfylkingin sé fullmótaður flokkur jafnaðarmanna. Mig grunar að Framsókn gæti farið upp í 13-15%. Ég er alla vega nokkuð viss um að núverandi ríkisstjórn mun ná kringum 50%.

Frjálslyndi flokkurinn er að mínu mati alveg að missa sig og hefur ekki náð að markera sig í þessari kosningabaráttu. Það sama gildir um Íslandshreyfinguna. Þessir flokkar eru bara alls ekki að ná þeim árangri sem margir reiknuðu með. Annað hvort verður Íslandshreyfingin sigurvegari þessara flokka á botninum, eða þá verða þeir nokkuð jafnir. Frjálslyndir verða ná kannski 4-5% fylgi.

Ég vona þá bara að bæði Sjálfstæðisflokkurinn og Eiríkur fari af með sigur þetta kvöld 12. maí nk. Eurovision og Alþingiskosningar á sama kvöldi :P Algjör snilld.

Fylgishreyfing mest meðal kvenna á vinstri vængnum